అత్తవారిల్లు

అత్తవారిల్లు

జీవనతరంగాలు - 8

రాముడి అడుగులో అడుగేస్తూ వస్తున్న జానకిని, ఆగు వదినా అంటూ ఆడపడుచులు ఆపారు. ఏమిటి అన్నట్లుగా కళ్ళెత్తి చూసింది జానకి.
"అలా వెళ్ళిపోదామనే అన్నయ్య పేరు చెప్పు"అన్నారు.సిగ్గులమొగ్గ ఐంది జానకి. చిన్నగా "రామారావు" అంది .
"ఏమిటీ వినపడలే "
"పోనీ నేను చెప్పనా ?"
"అబ్బో అప్పుడే పెళ్ళాన్ని వెవకేసుకొస్తున్నాడు .ఆగరా అబ్బాయ్ నీ పని తరువాత "పెద్ద మేనత్త ఆర్డర్.
సిగ్గు సిగ్గు గా "నేనూ ,మావారు రామారావు గారూ వచ్చాము తలుపు తీయండి "అంది జానకి.
"అప్పుడేనా ? ఆడపడుచు కట్నం ఏదీ ?"
అక్క చూడకుండా నాన్న ఇచ్చ్చిన 116 రూపాయలూ మంగళ హారతి పళ్ళెం లో వేసాడు రామారావు.
"నాలుగు తరాల ఆడపడుచులం వున్నాము అంతేనా ?"
"చాలులే అత్తయ్యా" అక్క మాట.
"ఎలా ? పసుపు దంపుడు పాటనుంచీ పాడుతున్నాను, అప్పగింతల పాటా పాడాను ,రేపు సత్యనారాయణ వ్రతం పాటా పాడాలి ,మరి నాకు పట్టుచీర లేదా ?"
ఇంకో 116 రుపాయలు అత్తయ్య పట్టు చీర కోసం ఇచ్చాడు.పుట్టింటి నుంచి పసుపుకుంకుమే చాలు ఆడపడుచులకు.పావలాకాసైనా పదివేలు.ఐనా తమ్ముడిని దబాయించటం అదో సరదా!
ఇక చాలు లెండర్రా అంటూ అత్తగారు జానకి బుజం చుట్టూ చేతులు వేసి ఆప్యాయం గా ఇంట్లో కి తీసుకెళ్ళారు.
అత్తగారి ఏడుగజాల పట్టుచీర కాస పోసి కట్టుకొని ,భర్తతో కలిసి వ్రతం చేసుకొని కాళ్ళకు దండం పెడుతున్న జానకి ని కళ్ళ నిండుగా తృప్తి గా చూసుకున్నారు అమ్మ ,నాన్న .
సీతమ్మా వచ్చింది అత్తింటికి
https://www.youtube.com/watch?v=33GNkLt3x1M&list=RD33GNkLt3x1M&start_radio=1&t=0

(https://kammatikala.blogspot.com/2009/09/blog-post.html)